బాలీవుడ్ సూపర్ స్టార్ సల్మాన్ ఖాన్(Salman Khan) ఏం చేసినా అది ఒక సెన్సేషన్. ఆయన వేసుకునే బట్టల నుంచి వాడే వాచీల వరకు అన్నీ వార్తల్లో నిలుస్తుంటాయి. తాజాగా సల్మాన్ ఖాన్ వేసుకున్న బూట్లు ఇప్పుడు సోషల్ మీడియాలో హాట్ టాపిక్‌గా మారాయి. చూడటానికి రంగు వెలిసిపోయి, అక్కడక్కడా చిరిగినట్టుగా కనిపిస్తున్న ఆ బూట్ల ధర తెలిసి నెటిజన్లు నోరెళ్లబెడుతున్నారు. కేవలం ఆ పాతబడిన బూట్ల కోసమే సల్మాన్ ఖాన్ లక్షల రూపాయలు ఖర్చు చేశారన్న వార్త ఇప్పుడు తెగ వైరల్ అవుతోంది.

రీసెంట్‌గా ఒక ఈవెంట్‌లో సల్మాన్ ఖాన్ బ్లాక్ కలర్ అవుట్‌ఫిట్‌లో మెరిశారు. అయితే అందరి దృష్టి ఆయన వేసుకున్న 'లెదర్ కౌబాయ్' బూట్లపై పడింది. అవి కొత్తవా లేక పాతవా అనే అనుమానం వచ్చేలా డ్యామేజ్ అయి కనిపిస్తున్నాయి. తీరా ఆరా తీస్తే.. అవి ప్రపంచ ప్రఖ్యాతి గాంచిన లగ్జరీ బ్రాండ్ 'బాలెన్సియాగా' (Balenciaga) కు చెందినవని తేలింది. వీటి ధర దాదాపు రూ.1.20 లక్షల నుంచి రూ.1.50 లక్షల వరకు ఉంటుందని సమాచారం.

ఇదేం ఫ్యాషన్ రా బాబోయ్!
ఈ బూట్ల ఫోటోలు బయటకు రాగానే సోషల్ మీడియాలో నెటిజన్ల కామెంట్లు వెల్లువెత్తుతున్నాయి. "మా ఇంట్లో పాత సామాన్ల బుట్టలో కూడా ఇలాంటి బూట్లు ఉండవు.. దీనికి లక్షన్నర రేటా?", "చిరిగిన బూట్లు వేసుకోవడమే ఫ్యాషన్ అయితే, మాకంటే పెద్ద ఫ్యాషన్ ఐకాన్స్ ఎవరూ ఉండరు" అంటూ నెటిజన్లు సెటైర్లు పేలుస్తున్నారు. మరికొందరైతే "సల్మాన్ భాయ్ రేంజే వేరు.. ఆయన చిరిగిన బూట్లు వేసుకున్నా అది ఒక ట్రెండ్ సెట్ చేస్తుంది" అంటూ వెనకేసుకొస్తున్నారు.

నిజానికి ఇలాంటి 'డిస్ట్రెస్డ్' (Distressed) లుక్ కలిగిన ఉత్పత్తులను తయారు చేయడంలో బాలెన్సియాగా బ్రాండ్ ప్రపంచ ప్రసిద్ధి. కావాలనే పాతబడినట్టుగా, చిరిగినట్టుగా డిజైన్ చేయడం వారి స్టైల్. గతంలో కూడా ఈ బ్రాండ్ ఇలాంటి వింత ఫ్యాషన్ వస్తువులను లక్షల ధరలో అమ్మి వార్తల్లో నిలిచింది. ఇప్పుడు సల్మాన్ ఖాన్ ఆ ట్రెండ్‌ను ఫాలో అవ్వడంతో ఇండియాలో ఈ బ్రాండ్ గురించి చర్చ మొదలైంది. మరి భవిష్యత్తులో ఈ 'చిరిగిన బూట్ల' ఫ్యాషన్ ఇంకెంత మంది సెలబ్రిటీలను ఊపేస్తుందో చూడాలి.